Rusiye tarafı ateşkesnen bağlı fikirlerinen memorandum şekillendirilüvini sozmağa tırıştı, dep bildirdi Ukrayina mudafaa naziri Rustem Umerov mayısnıñ 28-nde.
Onıñ aytqanına köre, halqara basqı oldı, ve ABD prezidenti, Avropa memleketleriniñ liderleri ve prezident Volodımır Zelenskıynıñ beyanatlarından soñ «rusiyeliler «memorandumını» yazıp bitirgenlerini, niayet, haber etti.
«Olar vesiqa berilüvini sozalar. Men Rusiye eyyetiniñ yolbaşçısına Ukrayinanıñ fikirlerinen vesiqamıznı berdim. Bu vesiqanı alğanlar», – dedi Umerov.
Ukrayina naziri Ukrayinanıñ tolu ve şartsız ateşkeske ve diplomatik işke azır olğanını tasdıqladı:
«Körüşüv boş olmasın ve cenk bitmesini kerçekten yaqınlaştırsın dep, rusiyelilernen körüşüvlerge qarşı degilmiz ve olardan «memorandum» bekleymiz. Rusiyeniñ yolğa çıqmalarına qadar daa dört künü bar, vesiqalarını bizge yollay bileler».
Umerovnıñ qayd etkenine köre, taraflarnıñ körüşüvleri netice ketirmek kerek, ve bunıñ içün er bir taraf azırlanmalı. O, Rusiye tarafı vesiqasını deñişüvden soñ birden berecegini vade etken edi, dep qayd etti.
«Rusiye tarafını vadelerini acele yerine ketirmesine ve körüşüvni neticesiz yapmaq ıntıluvlarını toqtatmasına çağıramız. Diplomatiya mündericeli olmalı, yañı körüşüvniñ ise neticesi olmalı», – dep qoştı Umerov.
Mayısnıñ 28-nde Rusiye Tış işler nazirligi Rusiye tarafı Ukrayina ile barışıq añlaşması memorandumı üzerinde işini bitirdi, dep bildirdi.
Mayısnıñ 16-nda İstanbulda Rusiye ve Ukrayina eyyetleri arasında muzakerelerniñ birinci turı keçti. Taraflar «1000-ge 1000» formatında cenk esirlerini deñişmege añlaştı. Medinskiyniñ aytqanına köre, Kyiv Rusiye ve Ukrayina prezidentleri arasında doğrudan-doğru muzakereler keçirilmesini istey.
Eki taraf üç yıl içinde ilk sefer muzakere masası başına oturdı. Ukrayina ateşni 30 künge toqtatmağa talap etti. Lâkin Rusiye tarafı topraq isteklerinden öyle de vazgeçmedi – dört Ukrayina vilâyetinde öz suverenitetiniñ tanılmasını istey, Moskva bunı ateş toqtatıluvınıñ şartı olaraq bildire.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
