ABD prezidenti Donald Trump, kerek olsa, Rusiye ve Ukrayina prezidentleri Vladimir Putin ve Volodımır Zelenskıynen üç taraflı körüşüv keçirmege azır, dep bildirdi.
Trumpnıñ aytqanına köre, o, Putin Cenkni kerçekten bitirmege isteymi şimdilik aytıp olamay, amma tahminen eki aftadan soñ cevabını bilecek. «Bizni aldatamı-yoqmı bilecekmiz, ve öyle olsa, başqaca cevap berecekmiz», – dep ayttı Amerika prezidenti Beyaz sarayda jurnalistlernen subetleşip.
Trump keçken raatlıq künleri Ukrayinağa qarşı yapılğan kütleviy ücümlerden «çoq ümütsizlikke» oğrağanını da qayd etti. Rusiyege qarşı sanktsiyalar ne içün kirsetmedi sualine Trump ola bilecek barışıq añlaşmasını bozmaq istemey, dep cevap berdi.
ABD prezidenti Donald Trump cenkni tez bitirmek istegenini çoq aytqan edi. Washington muzakereler neticesiz olsa, olardan çıqıp, Rusiyege qarşı qoşma sanktsiyalar kirsetecek, dep bildirgen edi.
Soñki künleri Trump Vladimir Putinniñ yapqanlarından memnün olmağanını çoq ayttı. The Wall Street Journal mayısnıñ 26-nda Trump bu aftanıñ soñuna qadar Rusiyege qarşı yañı sanktsiyalar kirsetüv imkânını baqa, dep haber etken edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
