Ukrayina Tış işler naziri Andriy Sıbiğa Rusiyeniñ iyünniñ 2-nde muzakere keçirmek teklifini izaatladı.
«Bazarertesini ne içün bekleymiz? Rusiyeliler «memorandumını» niayet azırlağan olsa – on kün tüşünip ve ücüm etip – onı birden bizge bermek mümkün», – dedi o.
Ukrayina naziri Rusiye tarafı muzakerelerniñ nevbetteki turını bozmaz ve «evelden añlaşılğanı kibi, tekliflerini bizge baqmamız içün tez berer», dep beklegenini bildirdi.
«Tek yahşı azırlanğan körüşüv kerçek neticeler bere bile», – dep qayd etti o.
Rusiye naziri Rustem Umerovnıñ bildirgenine köre, Ukrayinanıñ ateşkes fikirlerinen vesiqasını Rusiye tarafına berdi.
Mayısnıñ 28-nde Rusiye Tış işler nazirligi Rusiye tarafı Ukrayina ile barışıq añlaşması memorandumı üzerinde işini bitirdi, dep bildirdi.
Mayısnıñ 16-nda İstanbulda Rusiye ve Ukrayina eyyetleri arasında muzakerelerniñ birinci turı keçti. Taraflar «1000-ge 1000» formatında cenk esirlerini deñişmege añlaştı. Medinskiyniñ aytqanına köre, Kyiv Rusiye ve Ukrayina prezidentleri arasında doğrudan-doğru muzakereler keçirilmesini istey.
Eki taraf üç yıl içinde ilk sefer muzakere masası başına oturdı. Ukrayina ateşni 30 künge toqtatmağa talap etti. Lâkin Rusiye tarafı topraq isteklerinden öyle de vazgeçmedi – dört Ukrayina vilâyetinde öz suverenitetiniñ tanılmasını istey, Moskva bunı ateş toqtatıluvınıñ şartı olaraq bildire.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
