Rusiye Federatsiyasınıñ Tış işler nazirligi bildirgenine köre, İstanbulda Ukrayina ile keçirilecek muzakerelerniñ ekinci turına kene aynı eyyetni yollamağa planlaştırıla. Bu aqta mayısnıñ 29-nda Rusiye Tış işler nazirliginiñ resmiy vekili Mariya Zaharova bildirdi.
Tış işler naziri Sergey Lavrov Rusiye Ukrayinağa kelecek bazarertesi künü, iyünniñ 2-nde, İstanbulda muzakerelerniñ ekinci turı içün körüşmege teklif etti, dep bildirdi. Lavrov Rusiye tarafı Ukrayina ile barışıq añlaşması memorandumı üzerinde işini de bitirdi, onı körüşüvde Rusiye prezidentiniñ yardımcısı Vladimir Medinskiy taqdim etecek, dep bildirdi.
Kreml İstanbuldaki muzakerelerniñ şartlarını Ukrayinağa bermedi, Kyiv bunı tenqit etti. Prezident Volodımır Zelenskıy Kreml muzakerelerni «boş» yapmağa tırışa, dep bildirdi. Ukrayina Rusiye iyünniñ 2-ne teklif etken körüşüvge şimdilik resmiy şekilde razı olmadı.
Mayısnıñ 16-nda İstanbulda Rusiye ve Ukrayina eyyetleri arasında muzakerelerniñ birinci turı keçti. Taraflar «1000-ge 1000» formatında cenk esirlerini deñişmege añlaştı. Medinskiyniñ aytqanına köre, Kyiv Rusiye ve Ukrayina prezidentleri arasında doğrudan-doğru muzakereler keçirilmesini istey.
Eki taraf üç yıl içinde ilk sefer muzakere masası başına oturdı. Ukrayina ateşni 30 künge toqtatmağa talap etti. Lâkin Rusiye tarafı topraq isteklerinden öyle de vazgeçmedi – dört Ukrayina vilâyetinde öz suverenitetiniñ tanılmasını istey, Moskva bunı ateş toqtatıluvınıñ şartı olaraq bildire.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
